مکہ مکرمہ (خِطاب نیوز) مسجد الحرام کے امام و خطیب شیخ عبدالرحمٰن السدیس نے خطبہ جمعہ کے دوران حوثی ملیشیا کی جانب سے مکہ مکرمہ، مدینہ منورہ اور شہری تنصیبات کو نشانہ بنانے کی شدید الفاظ میں مذمت کی ہے۔
خِطاب نیوز کے مطابق، امامِ حرم نے اپنے خطبے میں واضح کیا کہ مقدس مقامات پر حملے دنیا بھر کے مسلمانوں کے جذبات اور دینی احساسات کو مجروح کرنے کا باعث بنتے ہیں۔ انہوں نے زور دے کر کہا کہ حرمین شریفین کا احترام اور حرمت ایک سرخ لکیر کی مانند ہے، جسے کسی صورت پامال یا عبور نہیں کیا جا سکتا۔
اس کے علاوہ اپنے خطبے میں انہوں نے جدید ٹیکنالوجی کے منفی استعمال پر بھی گفتگو کی۔ ان کا کہنا تھا کہ مصنوعی ذہانت (AI) کے ذریعے جعلی ویڈیوز اور آوازیں تیار کر کے گمراہی پھیلانا صریح جھوٹ اور حرام عمل ہے۔ انہوں نے اس بات پر زور دیا کہ جدید ٹیکنالوجی اللہ کی ایک عظیم نعمت ہے، لہٰذا اسے رب کی اطاعت، انسانی فلاح اور اس کی خوشنودی کے کاموں میں ہی استعمال کیا جانا چاہیے۔
دوسری جانب، مسجد نبوی ﷺ کے امام و خطیب شیخ خالد المعینا نے اپنے خطبہ جمعہ میں بیان کیا کہ جو عناصر حرمین شریفین سے بغض اور عداوت رکھتے ہیں، ان کی یہ دشمنی بالآخر انہیں ذلت، رسوائی اور تباہی کی طرف لے جاتی ہے۔ انہوں نے یاد دہانی کرائی کہ مکہ مکرمہ اللہ تعالی کا سب سے محترم گھر اور اس کی نگاہ میں کائنات کی محبوب ترین سرزمین ہے۔
