اسلام آباد (خطاب نیوز) — وزیراعظم محمد شہباز شریف کی زیر صدارت خیبرپختونخوا کی امن و امان، سیاسی اور سکیورٹی صورتحال پر ایک اعلیٰ سطحی اجلاس منعقد ہوا، جس میں صوبے کی مجموعی صورتحال، پاکستان تحریک انصاف کے ممکنہ لانگ مارچ اور مختلف آئینی و قانونی آپشنز کا تفصیلی جائزہ لیا گیا۔ یکم اکتوبر کو ہونے والے اس اجلاس کے دوران صوبے میں گورنر راج یا ایمرجنسی نافذ کرنے سمیت مختلف امکانات پر غور کیا گیا، تاہم کسی بھی حتمی اقدام کا فوری اعلان نہیں کیا گیا۔
ذرائع کے مطابق اجلاس میں وفاقی وزیر داخلہ محسن نقوی نے وزیراعظم کو خیبرپختونخوا کی امن و امان کی صورتحال، ممکنہ لانگ مارچ اور تحریک انصاف کے ساتھ جاری پسِ پردہ رابطوں کے حوالے سے جامع بریفنگ دی۔ اس کے علاوہ وزیرِ قانون نے صوبے کی موجودہ صورتحال کے آئینی و قانونی پہلوؤں پر اپنی قانونی رائے پیش کی، جبکہ دیگر حکومتی رہنماؤں نے سیاسی صورتحال اور اتحادی جماعتوں سے ہونے والے رابطوں کے بارے میں شرکاء کو آگاہ کیا۔
اجلاس میں غور کیا گیا کہ کسی بھی حتمی فیصلے سے قبل متعلقہ فریقین اور تمام اہم سیاسی اسٹیک ہولڈرز کو مکمل طور پر اعتماد میں لیا جائے، اور اس ضمن میں وزیراعظم شہباز شریف کی صدر مملکت آصف علی زرداری سے ملاقات کا امکان بھی ظاہر کیا گیا ہے۔ اجلاس کے دوران ممکنہ لانگ مارچ کی صورت میں امن و امان کی بحالی اور سرکاری املاک کے تحفظ کے لیے حکومتی حکمت عملی کا بھی باریک بینی سے جائزہ لیا گیا، جبکہ حکومت اور تحریک انصاف کے درمیان مذاکرات کے معاملات بھی زیرِ غور رہے۔
وزیراعظم شہباز شریف نے اجلاس سے خطاب کرتے ہوئے ہدایت کی کہ ملک میں امن و امان کا قیام اور ریاست کی رٹ کا تحفظ اولین ترجیح ہے، اور خیبرپختونخوا کے عوام کو درپیش مشکلات کے حل اور صوبے میں دیرپا امن کے قیام کے لیے تمام ضروری اقدامات ہر صورت یقینی بنائے جائیں۔
