نیویارک (خطاب نیوز) وزیراعظم محمد شہباز شریف کے دورہ امریکہ کے دوران پاکستان میں سرمایہ کاری کے فروغ، معاشی اصلاحات، نوجوانوں کی ترقی اور عالمی شراکت داری کے حوالے سے متعدد اہم ملاقاتیں منعقد ہوئیں۔ وزیراعظم نے امریکہ میں مقیم پاکستانی کاروباری شخصیات اور نوجوانوں کو پاکستان میں سرمایہ کاری اور ملکی ترقی میں بھرپور کردار ادا کرنے کی دعوت دی، جبکہ آئی ایم ایف کی منیجنگ ڈائریکٹر کرسٹالینا جارجیوا اور یورپی یونین کی اعلیٰ قیادت سے ملاقاتوں میں معاشی اصلاحات، تجارت اور باہمی تعاون پر تفصیلی تبادلہ خیال کیا۔
وزیراعظم نے نیویارک میں آئی ٹی، مصنوعی ذہانت، آٹو موبائل، توانائی اور تعمیرات سے وابستہ کاروباری شخصیات اور پروفیشنلز کے وفود سے ملاقات کرتے ہوئے کہا کہ حکومت ملک میں کاروبار اور سرمایہ کاری کے لیے سازگار ماحول فراہم کر رہی ہے۔ انہوں نے ایف بی آر میں اصلاحات اور زرعی شعبے میں جدت کے لیے جاری اقدامات پر بھی روشنی ڈالی۔ علاوہ ازیں، پاکستانی نوجوانوں کے وفد سے ملاقات میں وزیراعظم نے نوجوانوں کو بااختیار بنانے کے عزم کا اعادہ کیا اور لیپ ٹاپ اسکیم، دانش اسکولز اور دانش یونیورسٹی کے پراجیکٹس کا ذکر کیا۔
اقوام متحدہ کی جنرل اسمبلی کے 81ویں اجلاس کے موقع پر وزیراعظم نے آئی ایم ایف کی ایم ڈی کرسٹالینا جارجیوا سے ملاقات کی، جنہوں نے پاکستان کے معاشی استحکام کے لیے حکومت کی کوششوں کو سراہا۔ وزیراعظم نے یورپی کونسل کے صدر انتونیو لوئس سانتوس دا کوستا اور یورپی کمیشن کی صدر ارسلا گرتروڈ وان ڈیر لیین سے بھی ملاقات کی، جس میں پاکستان اور یورپی یونین کے تعلقات، تجارتی تعاون اور جی ایس پی پلس کی اہمیت پر تبادلہ خیال کیا گیا۔ اس کے علاوہ، وزیراعظم نے شام کے صدر احمد الشرع سے بھی ملاقات کی، جس میں دوطرفہ تعلقات، شام کی تعمیرِ نو اور مسئلہ فلسطین پر بات چیت کی گئی۔ ان اہم ملاقاتوں میں نائب وزیراعظم اسحاق ڈار، وزیر خزانہ محمد اورنگزیب اور دیگر اعلیٰ حکام بھی وزیراعظم کے ہمراہ تھے۔
