کوئٹہ (خطاب نیوز) کوئٹہ چیمبر آف سمال انڈسٹری کے سالانہ انتخابات برائے دو ہزار چھبیس تا اٹھائیس کا پہلا مرحلہ کامیابی سے مکمل ہو گیا ہے۔ الیکشن کمیشن کے مطابق کارپوریٹ اور ایسوسی ایٹ کلاس سے تعلق رکھنے والے تمام امیدوار بلا مقابلہ منتخب ہو گئے ہیں۔
وزارتِ تجارت کے ڈائریکٹریٹ اور ٹریڈ آرگنائزیشنز کی جانب سے انتخابی عمل کی نگرانی کی گئی، جبکہ ٹریڈ ڈیولپمنٹ اتھارٹی آف پاکستان کوئٹہ کے نمائندے زین العابدین نے بھی بطور آبزرور مراحل کا جائزہ لیا۔ الیکشن کمیشن نے کامیابی حاصل کرنے والے تمام ارکان کو مبارکباد دیتے ہوئے امید ظاہر کی کہ وہ بلوچستان میں تجارت کے فروغ کے لیے اپنا کردار ادا کریں گے۔
نومنتخب ارکان نے بھی کاروباری برادری کے مسائل حل کرنے کے عزم کا اظہار کیا ہے۔ انتخابی عمل کا پہلا مرحلہ مکمل ہونے کے بعد اب اگلا مرحلہ شروع ہوگا، جس میں صدر، سینئر نائب صدر اور نائب صدر کا انتخاب عمل میں لایا جائے گا۔
