کوئٹہ (خطاب نیوز): وزیراعلیٰ سیکرٹریٹ بلوچستان میں صوبے کے سماجی و اقتصادی شعبوں، معدنیات و کان کنی اور امن و امان کی صورتحال سے متعلق اہم اعلیٰ سطحی بریفنگز کا انعقاد کیا گیا۔ اجلاس کے دوران صوبائی حکومت کی حکمت عملی، جاری ترقیاتی منصوبوں اور عوام کو ملنے والے ثمرات کا تفصیلی جائزہ لیا گیا۔
سماجی و اقتصادی ترقی اور گورننس
وزارتِ منصوبہ بندی و ترقی بلوچستان کی جانب سے دی گئی بریفنگ میں حکومت کی سماجی و اقتصادی حکمتِ عملی پر روشنی ڈالی گئی۔ اجلاس میں گورننس کو بہتر بنانے، سروس ڈیلیوری، فنڈز کے مؤثر استعمال اور ترقیاتی منصوبوں کے ثمرات براہِ راست عوام تک پہنچانے کے اقدامات سے آگاہ کیا گیا۔
معدنیات و کان کنی کے شعبے میں پیش رفت
وزارتِ معدنیات و وسائل بلوچستان نے اپنے شعبے کی استعداد اور جاری منصوبوں کی تفصیلات پیش کیں۔ بریفنگ میں بتایا گیا کہ معدنیات کے شعبے کو جدید بنیادوں پر استوار کر کے بلوچستان کے عوام کو معاشی اور دیگر فوائد پہنچانے کے لیے متعدد اہم اقدامات کیے جا رہے ہیں۔
امن و امان، لیویز کا پولیس میں ضم اور سیف سٹی پروجیکٹ
وزارتِ داخلہ و قبائلی امور نے امن و امان سے متعلق بریفنگ میں پروونشل ایکشن پلان، پولیس اصلاحات اور خصوصاً لیویز فورس کو پولیس میں ضم کرنے کے عمل پر تبادلہ خیال کیا۔ اس کے علاوہ سیف سٹی منصوبے کی پیش رفت، ضروری قانون سازی اور قانون نافذ کرنے والے اداروں میں باہمی ہم آہنگی بڑھانے پر بھی تفصیلی روشنی ڈالی گئی۔
وزیراعلیٰ بلوچستان کا سوال و جواب کا سیشن
وزارتی بریفنگز کے اختتام پر وزیراعلیٰ بلوچستان کے ساتھ ایک تفصیلی سوال و جواب کا سیشن منعقد ہوا۔ وزیراعلیٰ نے شرکاء کی جانب سے اٹھائے گئے مختلف سوالات کے مفصل جوابات دیے اور صوبے کی مجموعی ترقی اور گورننس سے متعلق اپنا مؤقف پیش کیا۔
